اقبال ڈے: 149 ویں یوم ولادت پر فکرِ اقبال کانفرنس کا انعقاد
کراچی: حکیم الامت، شاعرِ مشرق علامہ محمد اقبال کا 149 واں یوم ولادت ملک بھر میں جوش و جذبے کے ساتھ منایا گیا۔ لاہور میں واقع مزارِ اقبال پر گارڈز کی تبدیلی کی خصوصی تقریب منعقد ہوئی، جس میں پاکستان بھر سے مختلف دستوں نے مزار پر فرائض سنبھالے اور عقیدت کے پھول نچھاور کیے۔
کراچی میں الیاس شادی ہال میں اقبال ڈے کے موقع پر فکرِ اقبال کانفرنس کا انعقاد کیا گیا، جس میں ملک بھر سے دانشوروں، ادیبوں، شاعروں اور تعلیمی و سماجی شخصیات نے شرکت کی۔ کانفرنس میں مقررین نے علامہ اقبال کے فلسفہ خودی، ان کے کلام اور برصغیر کے مسلمانوں کے لیے ان کے وژن پر تفصیلی گفتگو کی۔
مقررین نے کہا کہ علامہ اقبال نہ صرف ایک عظیم شاعر بلکہ ایک دور اندیش مفکر اور فلسفی بھی تھے، جنہوں نے مسلمانانِ برصغیر کو ایک آزاد و خودمختار وطن کا خواب دکھایا۔ انہوں نے کہا کہ اقبال کا پیغام آج بھی نوجوان نسل کے لیے اتنا ہی اہم اور متعلقہ ہے جتنا ان کے دور میں تھا، اور ان کی فکر سے رہنمائی حاصل کرتے ہوئے ہی پاکستان کو درپیش چیلنجز کا مقابلہ کیا جا سکتا ہے۔
تقریب کے اختتام پر مقررین نے نوجوان نسل پر زور دیا کہ وہ علامہ اقبال کے کلام اور فکر کا مطالعہ کریں تاکہ وہ اپنی تاریخ، ثقافت اور قومی شناخت سے جڑے رہ سکیں۔

